Ձեր վստահելի աղբյուրը

Եղվարդի մանկապարտեզի սաների թունավորման քրեական գործով վարույթն իրականացնող մարմինը դեռ որևէ եզրակացություն չի ստացել, սակայն թունավորման աղբյուրը պարզելու համար մշակվել են և քննություն է իրականացվում մի քանի վարկածների ուղղությամբ:

«Քննության առարկա են դարձել սնունդը, աղտոտվածությունը: Պարզվել է, որ այդ մանկապարտեզում տաք ջուր չկա,, հնարավո՞ր է՝ սառը ջրով ամանները լվանալու դեպքում մանրէները մնան.  անգամ դա է քննության առարկա է դարձել: Բոլոր հնարավոր վարկածներն այս պահին ստուգվում են»,-Panorama.am-ին հայտնեց Քննչական կոմիտեի մամուլի խոսնակ Սոնա Տռուզյանը:

Նրա խոսքով, 400 անձից վերցվել են կղանքի ու մեզի անալիզներ:

«Այդ մարդիկ մանկապարտեզի սաներն են, աշխատակիցներ, նույնիսկ աշխատակիցների հարազատները: Միգուցե վարակի սկզբնաղբյուրը աշխատակիցներից մեկի ընտանիքի անդա՞մն է եղել»,-ասաց կոմիտեի մամուլի խոսնակը:

Հիշեցնենք, որ նոյեմբերի 28-ին` ժամը 18:40-ին, Եղվարդ քաղաքի «Նաիրի» ԲԿ-ից ահազանգ է ստացվել, որ «սննդային թունավարում» նախնական ախտորոշմամբ Եղվարդ քաղաքի թիվ 1 մանկապարտեզից բուժօգնության են տեղափոխվել մանկահասակ երեխաներ: Այնուհետև երեխաների թիվն ավելացավ՝ գերազանցելով 100-ը: Երեխաներից բացի հիվանդանոց են տեղափոխվել նաև մանկապարտեզի աշխատակիցներ:

ՀՀ քննչական կոմիտեի Կոտայքի մարզային քննչական վարչությունում հարուցվել է քրեական գործ` ՀՀ քրեական օրենսգրքի 279-րդ հոդվածի 2-րդ մասի 1-ին և 2-րդ կետերով (սպառողների կյանքի կամ առողջության անվտանգության պահանջներին չհամապատասխանող ապրանքներ իրացնելու կամ ծառայությունների մատուցումը, որը կատարվել է մանկահասակների համար նախատեսված ապրանքների, աշխատանքների կամ ծառայությունների կապակցությամբ` անզգուշությամբ վնաս պատճառելով երկու կամ ավելի անձանց առողջությանը):

Առողջապահության նախարարությունից այսօր հայտնեցին, որ Եղվարդի մանկապարտեզում թունավորման հետևանքով հոսպիտալացված երեխաներից այս պահին շարունակում է հիվանդանոցային բուժում ստանալ 4 երեխա. 2-ը` Եղվարդի Նաիրիի բժշկական կենտրոնում, 2-ը` Երևանի «Նորք» ինֆեկցիոն հիվանդնոցում։ Շարունակվում է 36 երեխայի նկատմամբ ամբուլատոր բժշկական հսկողությունը:
Ավելի վաղ առողջապահության փոխնախարար Վահան Պողոսյանը հայտարարել էր,  որ մինչ այսօր բժշկական օգնության է դիմել շուրջ 108 երեխա, որից 75-ը հոսպիտալացվել են, 33-ը գտնվում են ամբուլատոր բուժման մեջ, 75 երեխայից 20-ը ապաքինվել ու դուրս են գրվել հիվանդանոցներից, 30-ը դեռ գտնվում են Եղվարդի «Նաիրի» բժշկական կենտրոնում, իսկ մնացածներն էլ «Նորք» ինֆեկցիոն բժշկական հիվանդանոցում:

ԳՆ Սննդամթերքի անվտանգության պետական ծառայությունից հայտնեցին, որ ծառայության Կոտայքի մարզային կենտրոնի տեսուչները եղել էին մանկապատեզում, կատարել նմուշառում մանկապարտեզում առկա սննդամթերքից. կարագ, պանիր, ձու, հավի միս, տոմատի մածուկ, խտացրած կաթ, տավարի միս: Այս սննդատեսակները լաբորատոր փորձաքննության են ենթարկվել ՍԱՊԾ ՀԱԲԼԾԿ ՊՈԱԿ-ում: Պարզվել է, որ կարագի, պանրի, ձվի, հավի և տավարի մսի անվտանգության ցուցանիշներով անհամապատասխանություններ չեն հայտնաբերվել, իսկ տոմատի մածուկի և խտացված կաթի լաբորատոր փորձաքննությունները ընթացքի մեջ են:

Ճշտվել է նաև, որ թունավորման նախորդ օրը մանկապարտեզի ճաշացանկում որպես ետճաշիկ տրվել է «Մուշ» ՍՊԸ-ի արտադրության նրբերշիկ՝ չնայած այն բանի, որ ՀՀ առողջապահության նախարարի 12.08.2013թ. թիվ 42-Ն հրամանով նախադպրոցական ուսումնական հաստատություններում չի թույլատրվում օգտագործել երշիկեղեն: ՀՀ ԳՆ ՍԱՊԾ պետի կողմից հանձնարարական է տրվել «Մուշ» ՍՊԸ-ում իրականացնել ստուգում:

Պարզվել է, որ մատակարարները Եղվարդի թիվ 1 մանկապարտեզ մատակարարծ նույն սննդամթերքից մատակարարել են նաև այլ մանկապարտեզներ («Հայկազունք» ՍՊԸ-ն՝ Երևան քաղաքի Արաբկիր, Կենտրոն, Շենգավիթ վարչական շրջանների մանկապարտեզներ, «Հակ-Մակ» ՍՊԸ-ն՝ Դարակերտի, Նորաբացի, Փարաքարի, Թաիրովի, Նոր Հաճնի մանկապարտեզներ, «Հելթի-Ֆուդ» ՍՊԸ-ն՝ Նոր Գեղիի մանկապարտեզ): Սակայն, Եղվարդի թիվ 1 մանկապարտեզից բացի, վերոնշյալ մանկապարտեզներում թունավորման դեպք չի արձանագրվել: Տրվել են կասեցման կարգադրագրեր բոլոր ընկերություններին՝ մանկապարտեզներ սննդամթերք չմատակարարելու վերաբերյալ:

Նախորդող հրապարակումներ՝
Այս պահին Եղվարդի մանկապարտեզում թունավորման հետևանքով հիվանդանոցային բուժում է ստանում 15 երեխա
 «Նաիրիի» ԲԿ-ում գտնվող թունավորված երեխաներից ևս ինը դուրս է գրվել
Եղվարդի մանկապարտեզում գրանցված թունավորման պատճառը դիզինտերիան է. փոխնախարար
«Թունավորված երեխաների մեծ մասի մոտ աղիքային վարակ է». մասնագետի մեկնաբանությունները
Եղվարդի թիվ 1 մանկապարտեզում կասեցվել է սննդամթերքի օգտագործումն ու մատակարարումը
ԱՆ. Հոսպիտալացված երեխաների առողջական վիճակը բարելավվում է
Եղվարդում հոսպիտալացվել է 54 երեխա. Հարուցվել է քրեական գործ
Եղվարդի մանկապարտեզում թունավորված 15 երեխայից 2-ը տեղափոխվել են Երևան
ՍԱՊԾ –ն՝ Եղվարդի թիվ 1 մանկապարտեզում սաների թունավորման դեպքի մասին
Պիպոյանը՝ Եղվարդի դեպքի մասին. «Դանակը հասավ ոսկորին»